Die Rheibrick

Lied zum Thema Wunsch

von  katzemithut

Mir henn des klännschde Nadelöhr
im Audobahn-Nord-Süd-Verkehr,
mir henn de engschde Flaschehals
graad zwische Karlsruh unn de Palz,
mir stehn vunn Kannel bis uff Wörth im Stau,
wemma nur ä Spur sperrt!

Ref. An däre Brick, an däre Brick, iwwer de Rhei,
nur Stick fer Stick kummsch du voraa,
wenn nix meh geht,
häßt's widder: "Chef, ich kumm zu spät!"

Die Streck umfahre isch nit leicht,
weil's dodefor noch ä Brick breicht,
anschunschde gäbt's nur Schiffsverkehr
in Leimersche unn Neiburch mit de Fähr,
die Waadeschlange stehn dort schunn,
de Fährmann macht heit Iwwerstunn.

Ref. Do fehlt ä Brick, do fehlt ä Brick iwwer de Rhei,
nur mit viel Glück kumm ich heit owend widder häm,
obwohl ich lengscht vum Sofa träm.

Spedeschdens nochm 10. Fluch,
denksch, allahopp, dann fahr ich Zuuch,
doch schunn im Bahhof-Parkhaus spannsch,
dass du känn Parkplatz finne kannsch,
weil alle annre ach dort stehen
unn lengscht Parkplatzsuch-Runde drehen.

Ref. ...
Unn die in Karlsruh dunn sich Zeit losse,
bis se ä Le(ö)sung gfunne henn,
bis die mol do isch, wachsen uns Flosse,
dass mir grad niwwer schwimme können.

Eichentlich isch's jo grundverkehrt,
wenn nur de Pennler sich beschwert,
ob ach de Siemens-Chef was saacht?
Unn hat sich der vun Daimler schunn beklacht,
weil - grad fer die wär's uubequem,
wenn ännes Daachs mol känner käm...

Ref. Dann streikt die Brick, dann streikt die Brick
dort iwwerm Rhei unn Stick fer Stick
geht dann die Produktion k.o. -
unn mir drehen ä "Happy-Video"...

Anmerkung von katzemithut:

Vorsicht, Dialekt!

http://www.youtube.com/watch?v=VxL_jfPsJRo

Hinweis: Du kannst diesen Text leider nicht kommentieren, da der Verfasser keine Kommentare von nicht angemeldeten Nutzern erlaubt.

Kommentare zu diesem Text


 tueichler (10.07.14)
Rheinhessen leidet mit!!

Tom;)

 katzemithut meinte dazu am 18.07.14:
Danke! In der letzten Zeit ging's zum Glück.
Aber immer, wenn was ist, wird es gleich heftig.
Zur Zeit online:
keinVerlag.de auf Facebook keinVerlag.de auf Twitter keinVerlag.de auf Instagram